1. CUNAGIUM, a Cuneus, Gall. Coin. Typus, seu ipsa typi percussio, qua signantur monetæ aliaque quam plurima e metallo confecta : Tributum pro impressione typi exsolvendum. Charta Edwardi III. Angl. Regis ann. 1337. apud Rymerum tom. 4. pag. 736. col. 1 :

Dederimus eidem filio nostro stannariam nostram in Comitatu prædicto, una cum Cunagio ejusdem stannariæ.

Et paulo post :

Cum omnibus ad prædicta stannariam et Cunagium ac curiam qualitercumque spectantibus,.... una cum Cunagio ejusdem stannariæ, et cum omnibus exitibus.... curiæ prædictæ.

Ejusdem tomi pag. 748. col. 1. in Charta ejusd. Reg. pro Willelmo de Monteacuto super exitibus Cunagii :

Rex Collectoribus sive Custodibus Cunagii stanni in Comitatu Cornubiæ salutem... Concesserimus... de exitibus Cunagii prædicti per manus vestras, et aliorum Collectorum et Custodum ejusdem Cunagii, etc.

Ibid. pag. 648. col. 6. in alia Charta ejusd. Edw. de compositione super emolumentis Cunagii :

Nisi tantum tertias partes emolumenti dicti Cunagii.

Et tom. 7. pag. 41. col. 1. in Charta ejusd. de moneta Scotiæ, ad Joannem de Bolton ann. 1374 :

Pro eo quod gentes Scotiæ per subtilitatem suam bonam monetam argenti extra regnum nostrum Angliæ subtraxerunt, et in Cunagium suum, ad minorem valorem quam moneta Angliæ extitit, posuerunt, et sic currit in solutione in regno prædicto, ad grave dampnum et deceptionem nostram, etc.

Denique tom. 9. pag. 471. col. 2. in Charta Henrici V. Angl. Regis ann. 1417 :

Controfactor misteræ monetæ et Cunagii multiplicator, et lotor auri et argenti cum cuneo nostro Cunatorum.