CURSERIA, Via in muris urbium ad hostes in expugnationibus propulsandos disposita, per quam ex una turri in aliam fit transitus : unde Cursoriæ dictæ. Litteræ Philippi Regis Franc. ann. 1280. de compositione murorum civitatis Carcassonæ, inter Anecd. Marten. tom. 1. col. 1160 :

Item, concessimus eidem Episcopo et dictis successoribus suis, quod unam de turribus quæ construuntur in muris prædictis habeant, teneant et possideant a parte inferiori usque ad Curserias, quæ fient desuper in muris prædictis : parte vero dictæ turris supra Curserias prædictas semper nobis et nostris gentibus remanente... Fiant siquidem clausuræ, sive portæ desuper in dictis Curseriis, ubi muri incipiunt domibus episcopalibus jungi in utroque capite dictarum Curseriarum a parte domuum episcopalium, ne transitus et aspectus in eisdem domibus pateat cuilibet transeunti.

Vide Curritorium et Corseria.