CYMBALUM, Campana, qua Monachi cientur ad refectorium, quæque appenditur in claustro, ut observat Durandus lib. 1. Ration. cap. 4. n. 11. et Chronicon Abbatiæ S. Trudonis lib. 9. pag. 406. Cymbalum refectorii, lib. 4. Histor. Vezeliacensis pag. 643. Lanfrancus in Decretis pro Ordin. S. Benedicti cap. 1 :

Cantata Nona exeant, Prior ad percutiendum Cymbalum, Hebdomadarii coquinæ et cæteri, qui servituri sunt ad injuncta sibi officia.

Alibi :

Qua (Nona) cantata, pulsato Cymbalo a Priore, pergant omnes in refectorium.

Constitut. Ordinis Præd. dist. 1. cap. 5 :

Postmodum pulsetur Cymbalum, si cibus sit paratus.

Vita S. Willelmi Abbat. Roschild. n. 20 :

Hora refectionis accessit ad Cymbalum, et percusso Cymbalo convocavit Conventum.

Liber Ordinis sancti Victoris Parisiensis MS. cap. 11 :

Pertinet ad Cellerarium, ut auferat malleolum, qui pendet ad Cymbalum.

Acta Episcoporum Cenoman. pag. 303 :

Hoc tantum paucis volui concludere verbis,

Quod dedit Ecclesiæ duo Cymbala maxima nostræ.

Et pag. 308 :

Detulit plane duo pretiosa Cymbala, etc.

Cymbalum porro ita expressit Ethelwlfus de Abbat. Lindisfarn. cap. 10 :

Continuo insonuit percussis cudo metallis,

Malleus et vacuas volitans cum verberat auras,

Jam cœnam fratrem peditans caldor eos ornat.

Occurrit crebrius in Ordine Romano, in ordine conversationis monasticæ cap. 11. et in Vitis Abbat. S. Albani.