DEPOSUIT, Versus cantici Magnificat, ad cujus cantum pluries aliquando repetitum, episcopus stultorum ludicræ dignitatis insignia, a recens electo suscipienda, adjunctis quibusdam ludis, deponebat ; unde Ludus Deposuit appellabatur. Hujus ritus non veneranda, sed ridenda antiquitas constat ex Statuto Odonis episc. Paris. contra festum fatuorum ann. 1198. in Chartul. ejusd. fol. 49. v°. :

Statuimus etiam ne dominus festi cum processione vel cantu ad ecclesiam adducatur, vel ad domum suam ab ecclesia reducatur... Deposuit quinquies ad plus dicetur loco suo.

Stat. capit. S. Petri Insul. 13. Jul. ann. 1531. ex Reg. K. act. capitular. ejusd. eccl. :

Nos decanus et capitulum ecclesiæ collegiatæ S. Petri Insulensis per singulos et per juramentum, durantibus capitulis generalibus, capitulariter congregati, pro comperto habentes scandala et ludibria, quæ sub Fatuitatis prætextu per beneficiatos et habituatos dictæ nostræ ecclesiæ a vigilia usque ad completas octavas Epiphaniæ fieri et exerceri consueverunt, in ecclesiæ et status ecclesiastici dedecus, vilipendium et contemptum redundare, matura deliberatione præmissa, statuimus et ordinamus, quod deinceps nullus nominetur, assumatur et creetur prælatus follorum, nec ludus, quem Deposuit vocant, in dicta vigilia, aut alio quocumque tempore, ludatur, exerceatur aut fiat.

Eadem ceremonia, non minus fortassis ridicule, adhibita etiam cum piæ alicujus societatis præfectus, in signum dimissi officii baculum patroni ejusdem, ut vocant, deponebat ; quod discimus ex Stat. ann. circiter 200. Hospit. S. Jacobi Paris. :

Après le diner on porte le baton au cueur, et là est le trésorier, qui chante et fait le Deposuit.

Stat. synod. ann. 1642. Petri de Broc episc. Autiss. :

Pendant que les batons de confrérie seront exposez pour être enchéris, l'on ne chantera Magnificat, et n'appliquera-t-on point ces versets Deposuit et Suscepit à la délivrance d'iceux ; ains on chantera quelque antienne et répons avec l'oraison propre en l'honneur du Saint, duquel on célebre la feste

. Vide Mercur. Franc. ann. 1733. mens. Aug. pag. 1764.