DIARIUM, Diurnum cibarium vel obsonium : quotidianus et diurnus victus, quantum diei sufficit. Papias : Salaria, Diaria, cotidiana cibaria. Glossæ Isid. : Diaria, cibus unius diei. Diaria, quotidiana salaria. Gloss. Gr. Lat. : Ὀψόνιον, Cibarium, Diarium. Σιτόμετρον, Opsonium, Diarium. Ebrardus Betuniensis in Græcismo :

Sunt, quæ sufficiunt in luce Diaria sumptus.

Testamentum S. Leodegarii ann. 671. apud Miræum Diplom. Belgic. tom. 1. pag. 335. col. 2 :

Quadraginta fratres quotidiana Diaria et stipendia omni tempore accipiant.

Vitæ Abbatum S. Albani :

Constituit quædam Diaria dari scriptoribus de Eleemosyna Fratrum et cellaria... ad edendum.

Mox :

Dietamque eorum, et Diaria sub certa quantitate... assignavit.

Rursum :

Pro tribus Diariis de reliquis mensæ Conventualis, ne scriptores in escis emendis impedirentur.

Liber Miraculorum S. Joannis Abbatis Reomaensis n. 7 :

Ubi diutissime tabescens, nil Diarii prorsus sumebat.

Petr. Damian. lib. 6. Epist. 2 :

Nam ubi diurno operi Diarium redditur, etc.

Diaria servorum, Satyrico, Cibaria in diem ad eorum victum quotidianum. Utuntur Ulpianus in leg. 21. de Adim. leg. (34, 4.) Julianus antecessor Nov. 115. cap. 23. etc. Vide Gl. Pithœi ad eumdem et Meursium in Διάριον.