DIDEMARII. Commodianus, de Simulacris Deorum :

Deludunt vos pauci scelerati,

Extricare suam dum quærunt vitam,

Subornant aliis esse sub mysterio, falsum

Indissimulantes, concussi numine quodam,

Majestatemque colunt, et se sub figura fatigant.

Vidistis sæpe Didemarios, quali fragore

Lusorias ineant, dum furias fingere quærunt,

Aut cum dorsa sua allidunt parca bipenne,

Cum doctrina sua servant quod cruore sanant.

Incertum, qui sint hi Didemarii falsorum deorum Sacerdotes, ac cultores, nisi legendum sit Dindymarii, ut fuerint Rheæ, seu Cibeles, quam Dindymen, et Δινδυμήνην vocabant, cujus sacra in Dindymo monte Phrygiæ fiebant, famuli et Sacerdotes, non modo Galli, qui castrati, sed et Corybantes vocati, quod cum insaniam ac belluinam quamdam rabiem imitarentur, capita insanorum more projicerent, cujusmodi Didemarii lusorias facere indicantur a Commodiano.