DISSICIO, pro Disseco, Jo. de Janua : Dissicere, removere, separare : componitur a dis, et secare. Gloss. Gr. Lat. : Διασϰορπίζω, Disicio, Dispargo, Dissipo. S. Ambrosius :

Ille veteris militiæ more Dissicere hostium cuneos, etc.

Prudentius Hymno 1 :

Tu Christe somnum Dissice.

Ubi Iso Magister, Dissice, defectivum verbum est. Adde lib. Peristeph. Hymn. 3. v. 209. Paulinus Epistola ad Desiderium pag. 261. edit. 1685 :

Nos in area sua ventilat, in nobis purgat triticum, Dissicit paleas, urit zizania.

lib. 3. de Vita S. Martini :

Dissiciensque cavæ fluitantia vellera nubis.

Lib. 3 :

Dissiciens ruptis membrorum vincula modis.

Eod. lib. :

Dissiciens sparsam procul a compage ruinam.

Denique lib. 6 :

Dissiciens, longeque suis Divortia ripis.

Ita in omnibus MSS. legi asserit Juretus, ut et apud Juvencum lib. 2 :

Dissicit ille mei pecoris per devia pastus.

Et apud Marium Victorem lib. 1. in Genesim :

.... Signataque limite certo

Tempora Dissiciens certa statione peracta.

Et lib. 3 :

Si tunc in partes populus se Dissicit unus.

Carmen de miseria vitæ humanæ, apud Barthium lib. 44. Advers. cap. 17 :

Utinam et tuorum nubila affectuum

Vitalis eadem Dissicet victoria.

Vide Savaronem ad Sidonium Carmine 5.