2. DRIZARE, Drizzare, iisdem Italis, Dirigere, figuram rectam rei alicui restituere ; unde Drizata et Drizzatio, ipsa ad rectum restitutio. Dresser, eodem sensu, dicimus. Charta ann. 1225. apud Murator. tom. 2. Antiq. Ital. med. ævi col 342 :

Et quod exstimatores communis Mutinæ non possint cambiare, ingroxare, neque Drizare in vineis et terris, etc.

Et col. 343 :

Ego exstimator juro bona fide cambia sive permutationes, et Drizatas, et divisiones ad meum officium pertinentes, facere secundum statuta et ordinamenta communia Mutinæ.

Stat. Mantuæ lib. 2. cap. 24. ex Cod. reg. 4620 :

De ingrossationibus et Drizzationibus et rerum divisionibus. Statuimus quod dom. potestas et ejus judices ad jus deputati teneantur et debeant ingrossare et Drizzare justo pretio, re per testes idoneos diligenter scrutata, petentibus ingrossationem vel Drizzationem sibi fieri in aliqua terra vel possessione posita infra terminos lapideos.

Pluries ibi Stat. Montis-reg. pag. 249 :

Item statutum est quod si esset in dicta bealeria seu bealeriis aliqua vota, quod dicta bealeria non iret acta, quod massarii dictæ bealeriæ possint facere Drizare, ita quod vadat recta.

Vide supra Dressare.