1. EDICTUM, Quævis regalis Constitutio vel præceptio, in Decretione Childeberti Regis cap. 4. in Edicto Chlotarii II. Regis, in Concilio Parisiensi V. can. 24. in Capitul. 2. ann. 805. cap. 4. in Capitul. 4. ejusdem anni cap. 5. etc. Præsertim vero ita Legum Longobardarum codicem a se compactum, appellari præcepit Rex Rotharis, ut auctor est Paulus Warnefridus lib. 4. cap. 44. lib. 5. cap. 33. Id etiam habetur in titulo Legibus Longobardicis editionis Heroldi præfixo pag. 205. Charta Desiderii et Adelchisi Regum in Bullario Casinensi tom. 2. pag. 8 :

Fecimus eum apprehendere, et in vincula mittere, et omnes res ejus, secundum quod Edictum continet paginæ, impublicare.

Vide Henric. Valesium ad Eusebii Histor. Eccles. lib. 9. cap. 10. et infra in voce Indictum. Regum Ostrogothorum leges hoc nomine romanis opponuntur, ap. Cassiodor. lib. 9. ep. 18. et alibi. Vide Savin. Histor. Jur. rom. med. temp. tom. 2. cap. 11. § 61. not. a. et § 64. not. c.

2. EDICTUM, pro Indictum, seu iis nundinis San-Dionysianis, quam Indictum vulgo vocant, usurpavit Odo de Diogilo lib. 1. de Profect. Ludovici VII. Regis in Orientem pag. 15 :

Illo anno in quarta feria Pentecostes Edictum accidit.

Vide Indictum.

3. EDICTUM, Proclamatio. Consuetud. Tolos. rubrica de in jus vocando :

Si vero non comparuerit accusatus, debet tubicinari per civitatem et burgum Tolosæ tribus Edictis vel tubicinationibus.

4. EDICTUM, Bannum, seu jus vendendi Domino competens, hominibus suis a venditione cessantibus, vel non vendentibus nisi certo pretio ipsis per Edictum indicato. Concilium Parisiense VI. ann. 829. lib. 1. cap. 52 :

Pauperibus sibi subjectis solent Edictum imponere, ut nullus illorum tempore messis modium frumenti, nec tempore vindemiæ modium vini majori pretio, quam quod ab eis constituitur, vendere præsumant.

Charta ann. 1104. apud Duchesnium in Historia Castrovillana :

Et omnes justitias, consuetudines et corveias, roagium, teloneum, Edictum, et furnum, et quæcumque in eadem villa possidebant.

Alia Hugonis Ducis Burgundiæ ann. 1182. apud Perardum pag. 300 :

In villa, quæ Poissons dicitur, Dux nec Edictum, nec aliquam exactionem, nec jus aliquod habet.

Consuetudo Lorriacensis ann. 1187 :

Nullus Lorriaci vinum cum Edicto vendat, excepto Rege, qui proprium vinum in cellario suo cum Edicto vendat.

Charta ann. 1228. ex Tabulario Campaniæ fol. 360 :

Nullus apud Calvimontem vinum cum Edicto vendat, excepto Comite, etc.

Charta ann. 1241. apud Thommasserium in Consuet. Bituric. lib. 3. cap. 15. pag. 419 :

Nulli eorum vendere licebit ad bannum : mihi autem licebit vendere vinum ad bannum semel in anno, per mensem tantum.

Vide Bannum vini.

5. EDICTUM, pro Banno quod pro matrimoniis fieri solet in Ecclesiis, in Concilio Sarisberiensi ann. 1217. cap. 13. et in Statutis Odonis Paris. Episc. cap. 7. § 1.

6. EDICTUM, Conventus. Statuta Academiæ Paris. apud Acher. Spicil. tom. 6. pag. 386 :

Nos Decanus et Collegium facultatis Decretorum Parisiensis, matura deliberatione præhabita pro statuendo, ut moris est, tribus Edictis solemniter evocatis.

Sic dicitur Conventus, ut puto, quod soleret edictis convocari.

7. EDICTUM, Statutum, Regula ; hinc Edictum Augustinicum, pro Regula S. Augustini. Vita S. Petri de Chavanon cap. 4. apud Acher. tom. 2. Spicil. pag. 698 :

Deus autem suorum fidelium messem augmentare volens, numerum supradictum visitans, in unum plures adunavit ei Regularium, qui sequantur victum Apostolicum, secundum Edictum Augustinicum nihil habentes in hoc mundo proprium.