ELEMENTA, Solem et lunam et reliquos planetas appellavit Hieronymus in Epist. ad Hedybiam, quæst. 4 :

Omnis hebdomada in Sabbatum, et in primam, et in secundam, et tertiam, et quartam, et quintam, et sextam Sabbati dividitur, quas Ethnici idolorum et Elementorum nominibus appellant.

Lactantius lib. 2. Instit. divin. cap. 6 :

Duplici ergo ratione peccatur ab insipientibus : primum quod Elementa, id est, Dei opera Deo præferant : deinde quod Elementorum ipsorum figuras humana specie comprehensas colunt. Nam solis lunæque simulachra humanum in modum formant, etc.

Ita Leo M. Serm. 7. de Nativitate Domini, Maximus Taurinensis Homilia de Luna, etc. sic etiam στοιχεῖα Græci aliquot Scriptores solem et lunam vocant, Chrysostomus Homil. 58. in Matthæum, Gregorius Nyssenus in Vita S. Macrinæ, Theodorit. lib. 5. Hist. 39. Martyrium S. Acepsimæ num. 4. Nicetas in Manuele lib. 7. pag. 432. Edit. Reg. etc. Vide Gloss. mediæ Græcit. in Στοιχεῖον, col. 1453. c.