EPIMENIUM, ἐπιμήνιον, Gloss. Isid. : Epimenia, senia, seu xenia. Gloss. Lat. MS. Reg. Cod. 1013 : Epimenia, exenia quæ dabantur per singulos menses. Ita etiam Gloss. Isid. Ugutio : Epimenia, orum, expensæ, vel exennia, vel tributa, quæ dantur per singulos menses post defectum lunæ, i. post novilunium. Gildas sapiens de Excidio Britanniæ :

Item queruntur non affluenter sibi Epimenia contribui, occasiones de industria colorantes, et ni profusior ejus magnificentia cumularetur, testantur se cuncta Insulæ, rupto fœdere, depopulaturos.

Paulo ante annonæ verbo utitur :

Impetrant sibi annonas dari, etc.

Vita S. Maglorii Episc. Dolensis cap. 27 :

Regi suadebant ut viros strenuissimos navigandi peritos inquireret, qui eandem navem cum tantis Epimeniis Maglorio incolumem præsentarent.

Usus est hac voce Juvenalis Sat. 7. ad quam vide veterem interpretem, et Pithœum.