ESOX, Piscis, cujus meminere Plinius, Isidorus lib. 20. cap. 2. Gregorius Turon. lib. 1. de Glor. Confess. cap. 5. Severus, Paulinus et Fortunatus in Vita S. Martini, Adamnanus Scotus de S. Columba cap. 24. Chronicon Montis-Sereni ann. 1171. etc. Glossæ Latinæ Saxonicæ cap. de Piscibus : Esocius, vel salmo, Lex : vel Læx, i. salmo. Esox, Esocis, Salmo piscis. Papias in MS. Bituric. Editus, Esme, Salmo, piscis. Charta anni 1252. in Histor. Mediani Monast. pag. 319 :

Dederunt... medietatem Esocium, qui vulgo Salmones vocantur.

Flodoardus lib. 14. Carm. 18 :

Sumunt tres de quinque Esoces, ad prandia tollunt.

Adde Legem Wisigoth. lib. 8. tit. 4. § 29. Hesychio ἔσοξ est piscis, qui non alius ab esoce : nam et isocem dixit Ardo Mon. in Vita S. Benedicti Abb. Anianensis n. 96. edit. Mabillonii. vide Eso.

Unum Esocem, qui vulgariter Chlobhausen dicitur

, in chart. ann. 1337. apud Huber. in Austria ex Archiv. Mellic. Germ. Hausen. Adel.