2. EXLEX, Qui beneficio legis privatur, adeo ut lege agere non valeat. Barthius in Glossario ex Hist. Palæst. Fulcherii : Exlex, Excommunicatus, is ad quem nec divini nec humani juris quicquam pertineat. Leges Edwardi Confess. cap. 19 :

Pueri vero qui ante malefactum fuerint nati vel generati, non erunt Exleges pro malefacto post generationes eorum peracto.

Adde cap. 37. Continuator Florentii Wigorn. ann. 1127 :

Clericus ab ordine deponatur, laicus vero Exlex et excommunicatus habeatur.

Ordericus Vital. lib. 10. pag. 327 :

Absit a me ut credam quod bonus Miles violet fidem suam ; quod si fecerit, omni tempore velut Exlex despicabilis erit.

Charta anni 1240. in Tabulario Campan. Biblioth. Regiæ fol. 365 :

Si quis dixerit aliquem Exlegem, vel aliquid quod sit æquivalens tali convitio, 5. sol. reddet Dominis, et Majori 6. den.

Bracton. lib. 3. tr. 2. cap. 11. § 1 :

Si infra tempus illud non venerit, pro Exlege tenebitur, cum Principi non obediat, et extunc utlagabitur, sicut ille qui est extra legem, sicut Langhelesman.

Adde lib. 5. tr. 5. cap. 31. § 7. Apud nostros dicebatur ille Perdre respons en Court, cui juri stare haud licebat, aut cujus testimonium in jure nullum erat. Occurrit sæpe hæc formula apud Petrum de Fontanis.