FANNATIO, vox forestarum : Tempus, quo pariunt damæ, quo scilicet prohibentur venationes exerceri, et omnimoda alia negotia, quæ aut parturientes damas, aut fœtus adhuc tenellos agitent, vel perturbent. Vide Ferina, Sona. Fan vero quasi Infans, ut quibusdam placet : quippe Gallis Faon, est hinnulus, νεϐρός, hinc faoneson, seu foineson. Charta Henrici Reg. Angl. de Foresta cap. 8 :

Tertium suanimotum teneatur in initio 15. dierum ante festum S. Joannis B. Propter Fannationem bestiarum nostrarum.

Charta alia Ricardi I. de Foresta, apud Rogerum Hoveden. pag. 784 :

Prohibendum est etiam ad placita forestæ, ne aliqua caretta exeat chiminum in foresta Regis, neque porci sint in foresta Regis tempore de Foinesun, scilicet 15. diebus ante Nativitatem S. Joan. Bapt. et 15. diebus post idem festum.

Charta ann. 1367. apud Kennett. in Antiq. Ambrosden. pag. 502 :

Tenentes de Brehull, etc. habere debent communem pasturam omnium averiorum suorum in omnibus locis forestæ... omnibus temporibus eis placentibus, præter cum capris bidentibus et porcis ætatis unius anni in mense Fannationis, videlicet quindecim dies ante festum Nativitatis S. Johannis B. et quindecim post.