FELESENNUS, Felezenus, Pronepos, Provinc. Feleno, Gall. Arriere-petitfils ; Felezena, Arriere-petite-fille, Proneptis. Glossar. Provinc. Lat. ex Cod. reg. 7657 : Felena, Prov. neptis, nepticula. Charta Caroli reg. Sicil. et comit. Prov. ann. 1298. ex Cod. reg. 4659 :

Item cum dicatur quod olim antiquitus in civitate prædicta (Avenione) tractatum fuit, statutum et inviolabiliter observatum, quod filiæ per patrem vel matrem dotatæ, ad successionem ipsorum parentum, fratrum vel sororum earum, nisi sub certa forma in dicto statuto contenta, nullo unquam tempore venire deberent. Tandem patre vel matre vivente, filia mortua, filiis vel filiabus relictis, volunt filii vel filiæ avo suo vel aviæ succedere vel legitimam suam petere, in eo scilicet casu, in quo mater ipsorum secundum formam prædicti statuti, petere vel habere nequiret. Volumus et mandamus ut in liberis eorum, qui Felezeni et Felezenæ censeri possunt, in successionibus avi vel aviæ et materni et maternæ idem observari facere debeatis, et velut eorum mater ex vigore dicti statuti expellebatur a successionibus talibus, sic ipsi modis omnibus expellantur, dum tamen dos data eorum matri vel aviæ legitimam portionem attingat

. Inquisit. ann. 1448 :

Joannes Borelli senior... respondit ... hæc dici audivisse ab ejus patre, qui fuit camerarius dom. Agouti de Agouto nepotis seu Felesenni dictæ dom. Raybaudæ .... Quod in hujusdem præstatione dum ille, qui hujusdem homagium recipiebat nomine curiæ, osculum, ut est moris, recipere vellet ab eadem dom. Raybauda, ipsa tum ad hoc obtulit supradictum ejus nepotem seu Felosennum (sic) tunc pupillum, quem in suis brachiis propriis accepit, dicendo : Vesi quis oscularet ; ob quod ipse dominus qui hujusdem homagium recipiebat, dictum pupillum osculatus fuit.

Charta reginæ Yoland. Comit. Prov. ann. 1420 :

Item quod si dos aliqua in pecunia assignetur per aliquem filiæ, nepti, Felesenæ, aut sorori dicti assignantis, etc.

Codicil. 1. Caroli Andeg. ultimi com. Prov. ann. 1481 :

Item legavit dom. noster rex .... generosæ domicellæ Helionoræ de la Rocha, Felezenæ strenui quondam comitis Troyæ, magni senescalli Provinciæ, summam duorum millium scutorum.

Formulæ Mss. ex Cod. reg. 7657. fol. 18. r° :

Considerans multa grata et accepta servitia et beneficia sibi impensa per Rixendam Felezenam suam, filiam T. et Sanxiæ conjugum,.... donavit dictæ Rixendi Feleysenæ (sic) suæ tanquam benemeritæ ... singula bona et jura sua,... salvis ... duodecim denariis, quos jure leguati donavit T. et T. Felezenabus suis, videlicet earum cuilibet sex denarios.

Occurrit præterea Felezenus in Charta ann. 1366. inter Probat. tom. 2. Hist. Nem. pag. 302. col. 2. quod minus bene de Genero interpretatur D. Menard in Glossar. ibidem.