FENESTRARE, Ugutioni, Fenestras facere, vel præparare. Fortunatus in Vita S. Albini Episc. Andeg. num. 18 :

Statimque duo cœci sunt pariter illuminati, tandem aliquando sumentes lumina diei ab umbra defuncti, nimirum agnoscentes ejus adminiculo se posse lumen consequi, cujus virtute potuisset paries Fenestrari.

Gocelinus Monachus in Vita S. Augustini Cantuar. Maii tom. 6. pag. 398 :

Nitebat cæsaries, non arte, sed gratia calamistrata, cœlesti nive dealbata, patriarchaliter liliosa, frons speculativa Dominicæ cruci patebat, quam media coma pro columna formose Fenestrabat.

Ibidem pag. 394 :

Facies amabilis et reverenda, frons mediante coma suis columnis resultabat Fenestrata ;

hoc est, aperta inter cincinnos naturales a dextris et a sinistris pendulos, quos arte componi prohibent Statuta antiqua inter Anecd. Marten. tom. 4. col. 1190. his verbis :

Prohibemus etiam ne Clerici, caractere neglecto, comas nutriant, aut Fenestratis tondeantur.

Vide Fenestratus.