FICATUM. Papias MS. : Epar, Græce : Jecur, i. Ficatum. Postrema verba absunt ab Edito. Alibi : Gecur, quod ibi ignis sit conditus ; vel quod gerat cor, Ficatum. Italis Fegato, Hispan. Higato. Glossar. Lat. Gall. Sangerman : Ficatum, Josier, foye. Sic porro jecur quodvis dictum volunt, quod olim jecur anserinum multaficu farciretur. Horat. lib. 2. Sat. 8. :

Pinguibus et ficis pastum jecur anseris albi.

Gloss. Græc. Lat. Συϰωτὸν, Ficatum. Gloss. Isid : Ficatum, quod Græci συϰωτὸν vocant. Perperam Ficotum habent Acta Martyrii S. Theodoriti apud Mabill. Analect. tom. 4. pag. 132. :

Nam sacrificium, quod acceperat, particulatim disrumpebat ejus Ficotum, et ejiciebat per os foras.

Infra :

Diversas accipiens escas, suo tantum pastus est Ficoto.

Vide Salmasium ad Solinum, Reinesium Var. Lect. 3. 4. supra Fegatum.