FICO, Genus calceamenti monachici, vel forte rusticorum. Certe Italis Fico rusticum significat. Proinde Fico Hibernis fuerit Calceus rusticorum. Gloss. Saxonicum Ælfrici : Fico, sco, i. calceus. Et quidem interdum ex materia lignea confectos ficones colligitur ex Vita S. Brigidæ tom. 1. Febr. pag. 132 :

Tunc invenit a Deo bonum consilium, et implevit duos Ficones suos carbonibus ignis, et infixit pedes suos in eis.

Inde tamen minime concludendum ficones constanter calceos fuisse crassioris formæ et materiæ ; nam pro calceis Episcoporum usurpat. Anonymus in Vita S. Cuthberti Episc. n. 14 :

Ficones novi, quibus calceatus est, in Basilica nostra inter reliquias pro testimoniis usque hodie habentur.

Adde n. 17. Vita S. Aidani Episc. Fernensis cap. 2. n. 13 :

Surgens de lecto, tenuit Ficonem circa unum pedem, cucurritque velocius ad silvam in occursum S. Maedhog.

Occurrit pluries in Vitis Sanctorum Hiberniæ. Vide Ficilis.