1. FIDELIS. Christiani dicti Fideles post susceptum baptismum, quia fidem susceperunt. S. Ambrosius lib. 1. de Sacram. cap. 1 :

In Christiano viro prima est fides. Ideo recte Fideles dicuntur, qui baptizati sunt.

S. Augustinus Tractat. in Joann. :

Interrogas hominem, Christianus es ? respondet tibi : non sum ; adhuc quæris ab eo, Catechumenus, an Fidelis ?

Idem Epist. 67 :

Frater Paulus narrat gaudia de Gabiano, quod non solum Christianus ; sed etiam Fidelis sit valde bonus per Pascha proximum baptizatus.

Vide eumdem de Verbis Apostoli Serm. 13. Innocent. I. Ep. 22. cap. 2 :

Quæro, si una eademque sit uxor ejus, qui ante Catechumenus, postea sit Fidelis.

Pontius Diac. in Vita S. Cypriani :

Quid Christiana plebs faceret, cui de Fide nomen est ?

Caffarus lib. 1. Annal. Genuens. apud Murator. tom. 6. col. 250 :

Ut lumen quod tempore Infidelium quondam in unoquoque anno ad sepulcrum venire solebat, nunc per misericordiam suam istud idem Fidelibus suis hodie in die resurrectionis suæ ostenderet.