Flatones, Eadem notione. Ordinarius MS. Ecclesiæ Rotomagensis :

Tenentur mittere per suos servitores ad domum Cantoris.... hora prandii unum panem magnum, unum galonem boni vini, honestum ferculum piscium, et unum magnum Flatonem de pinguedine lactis, etc.

Perperam Flaconem editum ad calcem Johan. Abrinc. de Offic. Eccl. pag. 169. Charta Communiæ Roiensis in Picardia :

Si quis gastellos, vel Flatones, vel hujusmodi, quæ villæ noceant, fecerit, etc.

Monasticum Anglic. tom. 1. pag. 149 :

Præterea percipiet coquinarius ad pascha tria præbendaria frumenti de granario ad Flathones inveniendos.

Habetur præterea in veteri Charta apud Bollandum 18. Febr. pag. 105. in libro Ord. S. Victoris Parisiensis MS. cap. 25. in Vita S Bernardi Pœnitentis n. 25. etc. Vide Flaco 3. et Flavo.

Fladones, dixit Fortunatus in Vita S. Radegundis cap. 15 :

Quæ in mensa sub Fladone segalatium panem et hordaceum manducabat.

Utitur præterea cap. 21. Udalricus l. 3. Consuetud. Cluniac. cap. 18 :

In illis festis fabæ sæpiis, aut Fladonibus mutantur.

Ita etiam Bernardus mon. a quo hausit, in iisdem Consuet. MSS. cap. 7. 77. nunc editis in vet. Discipl. Monast. S. Petri de Silva nigra apud Freder. Schannat. Vindem. Litter. pag. 164 :

Artocreæ aut Fladones in usus comedentium dentur honeste et abundanter.

Germani Fladen appellant hujusmodi placentas, Fuxenses Flauzons, apud quos conficiuntur e caseo, lacte pinguiori cum ovis. Lemovicensibus Flauniardes dicuntur, Flaudones in Obituario MS. S. Martialis Lemovic. Necrolog. MS. ejusd. Monast. :

V. Idus Aug. obiit dompnus Albertus Abbas, et Præpositus de Vernolio facit plenum convivium cum cepiis et Fladonibus, et bonum vinum et multum acquisivit.