FLAVI. Ita Franci indigitati in aliquot Græcorum Oraculis ob capillorum colorem. Rogerus Hovedenus pag. 650. ait, CPoli, in Porta Aurea, scripta hæc verba :

Quando veniet Rex Flavus Occidentalis, tunc ego per me ipsum aperiar, et tunc Latini imperabunt, et dominabuntur in civitate CPoli,

quando scilicet Franci urbem cepere ann. 1204. De quibus etiam, ut et de eadem expeditione, intelligendus Leo Imp. in Oraculo de Restitutione CP. a Leunclavio edito :

Ἀλλά σε πυρίστατον ϰαὶ ξανθὸν γένος

Πᾶσαν τεφρώσει, ϰαὶ τὸ σὸν λύσει ϰράτος

Anonymus in Paraphrasi oraculor. ejusdem Leonis :

Φέρων τε τόν πόλεμον, ϰαὶ τῶν ζανθῶν τὰς μηχανάς, etc.

Ita denique apud Pachymerem lib. 1. Hist. cap. 18. Franci dicuntur τὸ ξανθὸν, ϰαὶ ἀριμάνιον γένος, Flava et bellicosa gens. Claudianus in Rufinum lib. 2. de Gallis :

Inde truces Flavo comitantur vertice Galli.

Idem de Bello Getico, de Sicambris :

Agmina quin etiam Flavis objecta Sicambris.

Sidonius in Paneg. Aviti :

... Et Flavis in pocula fracte Sicambris

Rhene tumens.

Flavam etiam Germaniam vocat Auctor Vitæ sancti Adalberti Episc. Pragensis n. 10. Papias : Ruteni Flavi, id est, Flandrenses populi. Sed videtur legendum rutili : nam et rutilatas comas Livius lib. 38. Gallis tribuit, quos

celsioris staturæ pene esse omnes, et rutilos, luminumque torvitate terribiles

, scribit Ammianus lib. 15. S. Hieronymus in Vita S. Hilarionis, de quodam Candidato Constantini, gente Franco :

Rutilus coma, et candore corporis indicans provinciam.

Et de iisdem Francis Mamertinus in Paneg. Maximiani num. 16. Proluso crine rutilantes. Sidonius in Paneg. Majoriani :

... rutili quibus arce cerebri

Ad frontem coma tracta jacet, etc.

Tacitus de Germanis :

Truces et cœrulei oculi, rutilæ comæ.

Flavam Britanniam dixit Archithrenius lib. 5. cap. 4. Et Flavos Britones Auctor libri de Disciplina Scholarium cap. 2. Anglos etiam ita appellasse videtur Auctor Carminis de Curia Romana :

Hic partes Siculas, hic te Germania gaudens

  Visitat, hic Flavos, Patre jubente, viros.

Prudent. Apotheos. v. 495 :

Armiger e cuneo puerorum Flavicomantum.

Getarum rutilum et Flavum, S. Hieronymus Epist. 7. ad Lætam, e contra Furvam gentem, Indos appellavit Juvenalis Sat. 12. Vide Salmasium ad Plinium pag. 762. et quæ annotamus in Gloss. med. Græcit. col. 1012. in Ξανθοί.