FORANEITAS, dicitur de Canonico, qui foraneus est, seu qui non facit residentiam. Statuta Gosvini Episc. Tornacensis ann. 1209. tom. 3. Gall. Christ. inter Instr. col. 50 :

Statuimus ut quicumque Foraneus erit ab ecclesia portando oneri diei et æstus se subtrahens, ei stipendia subsequantur (f. subsecentur) ut de toto beneficio quod habet in ecclesia (non) amplius quam viginti solidos in anno Foraneitatis suæ se noverit recepturum ; quicumque autem de Foraneis stationarius esse voluerit, oportet ut per 40. dies ante nativitatem B. Joannis Baptistæ certum faciat Capitulum quod suam facturus veniet stationem in festo prædicto, ita quod si postmodum veniens toto anno servierit, tamen Foraneus habeatur et Foraneitatis legem subeat.

Charta Petri Episcopi Meldensis ann. 1245. ex Tabulario Ecclesiæ Meldensis fol. 48 :

Privilegiis super his dictæ Ecclesiæ concessis... super residentia et Foraneitate præbendarum, et perceptione fructuum earundem taliter duximus ordinandum.

Infra :

Si vero facta prima residentia Canonicus non habitus pro Foraneo post Kalendas Apriles cesserit, vel decesserit, etc.

Quid vero proprie sit Foraneitas, docet vetus Statutum Ecclesiæ Trecensis apud Camusatum pag. 150 :

Si absentes Canonici residentiam non fecerint per medietatem unius anni integre, dicti Canonici, qui dictam residentiam non fecerint, tenentur solvere 100. solid. Celerario Ecclesiæ totiens quotiens defecerint in dicta residentia facienda. Et si defecerint per unam diem de dicta residentia facienda, nihilominus debent solvere dictos 100. solidos. Et vocatur ista servitus, seu hujusmodi redhibentia, Foraneitas.

Charta ann. 1217. in Tabulario Ecclesiæ Carnotensis n. 228 :

Nihil autem habeat de pane et vino pro annualibus de Foraneitatibus, hoc est, de fructibus præbendarum foraneorum Canonicorum, etc.

Vide ibid. Ch. 314. Tabular. Episcopat. Ambian. ann. 1281. fol. 26. Hemeræum in Augusta Viromand. ann. 1159. 1230. et Jacobum Petitum post Pœnitentiale Theodori pag. 442. 444.