GALERIA. Anastasius Bibl. in S. Hadriano pag. 111 :

Alias vero tres domos cultas, videlicet Galeria posita via Aurelia,... reliquas vero duas, id est, Galeriam positam via Portuensi, etc.

Occurrit ibi non semel, et apud Ughellum tom. 1. pag. 121. 136. Concil. Compostell. ann. 1031 :

Ita æquum est, ut omnibus intra Galeriam stantibus pacis osculum sibi invicem tribuere. Et in omnibus communionibus majoribus Nativitatis Domini, Paschæ et Pentecostes, quisquis de quo habuerit, munera offerat.

Nescio, an inde orta sit vox Gallaria, Italis, Galerie nostris, pro longiori porticu, seu, uti vocatur a Sidonio lib. 2. Epist. 2. Cryptoporticu, quam vocem ortam quidam volunt, quod oblonga sit instar Galeræ, seu navis. Alii alia opinantur. Vide Jacob. Bourgoing lib. de Orig. et usu vulgar. vocum pag. 83. Octav. Ferrarium in Orig. Ital. Et Menagium in Gall. ubi vocis Galerie antiquitatem probat ex Bardino Senatore Tolosano, qui florebat ann. 1440. apud quem legitur :

Ambulacrum, quod nos Galeriam vocamus. Galeria sive corredor domus,

in Charta ann. 1471. ex Schedis D. Lancelot. Ead. notione sumitur in Instrumento anni 550. apud Rymerum tom. 14. pag. 390. col. 1 :

In quodam superiori ambulacro sive quadam superiori Galeria ex parte australi ædium sive hospitii illustrissimi Principis et Domini nostri Henrici VIII.

Vide Galilæa.