GURDUS. Gloss. MS. Reg. : Obtusa, surda, gurda. Papias : Gurda, inutilis, inepta, stulta. Eadem habent isidorus in Gloss. et Ugutio. Idem Papias : Obtusa, gurda. Gloss. S. Bened : Gurdus, ὁμϐλός. Pro ὁμϐλός leg. ἀμϐλίς, ex Castigat. in utrumque Glossar. Quintilianus lib. 1. Instit. cap. 5 :

Gurdos, quos pro stolidis accipit vulgus, ex Hispania duxisse originem audivi.

Etiamnum Hispani et Vascones Gordos, vocant pingues et obesos, ut tradit Oyhenartus in Notitia Vasconiæ. Academ. Hispan. Gurdo, stolidus, bardus. Regula Magistri cap. 50 :

Duricordes vero et simplices fratres, vel qui litteras discere nolunt, et non possunt, ipsi Gurdis operibus intricentur.

Abbo lib. 1. de Obsid. Parisiensi vers. 424 :

Noxque falam Gurdis mandat custodibus ipsam.

Et infra lib. 2. vers. 525 :

... Ponunt animas cum sanguine Gurdi.

Ubi, ut et aliis locis, lib. 1. vers. 531. Gurdos, ineptos et stultos interpretatur. Occurrit etiam in Notis Tyronis pag. 102. Robert. Gaguinus in Poem. vernaculo, le passe-temps de l'oisiveté :

Guerres et de Dieu le grand flaeil,

Et le maillet de sa Justice,

Qui est aux bons paix et conseil,

Et terreur au Gourt et au nice.

At contra vocem Gourd in bonam partem non semel usurpat Sangelasius in Viridario honoris.