1. GUSSA, Goza, Guzia, Machinæ bellicæ species. Usatici Barcinonenses MSS. cap. 83 :

Nemo præsumat... castrum contra Principem ædificare, nec fortitudinem tenere obsessam, nec debellare cum ingeniis, quod rustici dicunt fundibula, et Gosa, et gata, quod magnum dedecus erit Potestatibus.

Charta Jacobi I. Regis in Constitutionibus Catalaniæ MSS. :

Statuimus, quod nullus portet fundibulum, Guziam, vel gatam, aut aliquid aliud ingenium contra aliquem, sine speciali nostro mandato, nec trahat cum eis, nisi de hoc habeat a nobis... privilegium speciale.

Edictum Nunonis Sancii D. Rossilionis de Treuga tenenda ann. 1217 :

Statuimus... quod nullus expugnet aliquod castrum, vel aliquam munitionem cum Gussa, vel perrerio, vel manganello, vel cum alio genere lignorum.

Ita porro appellata fortean hæc machina, quod canis formam referret : nam Occitanis Goussas, canis species est, Chien matin, Clabaud. Vide supra Gossus.