HAMFARE, ut et Hamsocna, Insultus factus in domo, apud Bromptonum pag. 957. ubi tanquam synonyma ponuntur, ut et in Legibus Henrici I. cap. 80 :

Si quis alium in sua vel alterius domo,....... vel domum sagittet, vel lapidet, vel colpum ostensibilem undecumque faciat,... hamsocnam est, vel Hamfare.

Inter Anglo-Saxones vocem non reperio, inquit Somnerus : effictam tamen puto ab ham, domus mansio, et fri, vel frið, pax, quies ; quo hamsocnæ ad amussim quadrare quis non videt ? nisi malis fare, sensu quo in herefare, et fyrdfare, acceptum, quasi profectio in domum.