HAMSOCA, Hamsocna, Hamsoken, Domus seu habitationis immunitas, a Saxon. Ham, domus, habitatio, et sokne, libertas, immunitas. Inquisitio, consectatio. Vide Bosworth. in hac voce § 3. : quasi habitaculi privilegium, ita ut qui id effringit, Hamsocnam facere dicatur : Kilianus :

Heym-soecken, Germ. Sax. Sicamb. Visere, invisere, visitare. Item, Invadere violenter alicujus domum, vi irrumpere in alterius ædes.

Vide Hussuchung. quod crimen eo atrocius videri debet, non solum quod pax regia violetur : sed etiam quod domus regia (qua nihil est sanctius, nihil omni religione munitius) tutissimum sit unicuique receptaculum et refugium. Ideoque in eo nemini injuria inferri, neque quisquam de domo sua extrahi debeat leg. 12. de In jus vocando. (2, 4.) Vulgo autem definitur Hamsocna, Invasio mansionis, ut in Legib. Canuti Regis § 28. Insultus factus in domo, apud Ranulph. Cestr. lib. 1. cap. 50. et Bromptonum pag. 957. Invasio domus, apud Bractonum lib. 3. tract. 2. cap. 23. § 3. Cujus quidem criminis mentionem agunt Leges Saxonicæ Edmundi Reg. Angl. apud eumdem Bromptonum § 6. Leges Ethelredi § 25. Leges Henrici I. cap. 12. 59. 61. 80. Britton. pag. 72. etc. Hujus vero cognitio inter jura regia recensetur in iisdem Legibus Henrici I. cap. 10. 12. 35. 80. Record. tempor. reg. Johan. Bedef. rot. 5. in Placit. Abbrev. pag. 94 :

Henricus-Bunin appellat Ricardum Everard et alios de pace regis infracta, etc. et quod venit prædictus Ricardus et alii ad domum suam et ostia domus suæ fregerunt et in pace domini regis et nequiter et in Hamsoka et extraxerunt eum et uxorem suam et pueros suos et in roberia ceperunt et asportaverunt unum pallium, etc.