Ermofroditus (sic) inter infames ponitur, et non potest esse advocatus.

Charles, etc. Scavoir faisons... nous avoir receu l'humble supplication des amis charnels de Laurence femme de Colin Poittevin, jeune femme aagiée de xvj. ans ou environ, d'Esclimont en la chastellenie de Galardon, de la parroisse de Blury, prisonniere du sire d'Amboize au regart de la justice d'Estrignoles, contenant comme deux ans eut en Aoust derrenierement passé ou environ, Jehanne femme de Perrin Goula dudit lieu d'Esclimont à un jour... se trahy pardevers icelle Laurence pour aler soyer avec elle ; .... et quant vint sur la relevée,... laditte Jehanne dist à laditte Laurence telles paroles ou semblables : Laurence, se tu veulx estre ma mie, je te feray beaucoup de bien ; laquelle Laurence, qui ne pensoit à nul mal, lui dist qu'elle le vouloit bien : et adonc icelle Jehanne sans plus dire prist laditte Laurence et la jeta sur une javelle de blé ; et lors dist à laditte Jehanne : que me voulez vous faire ? vous n'estes pas femme comme les autres ; et icelle Jehanne lui dist : tés toy, tu le saveras assez tost ; et adonc icelle Jehanne rebrassa laditte Laurence et monta sur elle, comme un homme fait sur une femme, et commença icelle Jehanne à remuer ses reins et faire en la maniere que un homme fait à femme, et tant que par eschaufoison, que elle fist nature en laditte Laurence ; et lors se leva laditte Jehanne de dessus elle, et commencerent à soyer jusques au soir qu'il s'en alerent en leurs hostelz. Et trois jours après, laditte Jehanne ala à l'hostel d'icelle Laurence et lui dist : Je vien à toy parler d'amouretes ; et lors prist icelle Laurence et la geta à terre ; et lui fist ce que homme doit faire à femme, comme gieter sa nature en laditte Laurence... Icelle Laurence ala aveq laditte Jehanne ès vignes ;... et quant ilz eurent un peu besongné, laditte Jehanne dist à laditte Laurence : sa il faut que je te face cela, et ce que acoustumé lui avoit ; et laditte Laurence lui respondi que elle le vouloit bien ; et le lui fist en une fosse desdittes vignes... Et quant icelle Laurence aloit à la fontaine quérir de l'eaue, elle trouvoit aucunesfoiz laditte Jehanne, qui gardoit les bestes près d'icelle fontaine, qui par pluseurs foiz lui avoit fait les choses dessusdittes... Pour occasion desquelles choses laditte Laurence prisonniere est en adventure de bien briefment finer ses jours, se par nous ne lui est sur ce impartie et extendue nostre grace, etc.