HOBELLARII, Hoberarii, Hobillers, sic Anglis nuncupati milites levis armaturæ, et mediocri equo et cursorio merentes, quem Angli an hobby vocant, Hobin Philippus Cominæus lib. 6. cap. 7. quos Jacobus Waræus in Antiquitatibus Hibernicis cap. 7. ait esse equos ex Hibernia, sic appellatos ob mollem incessum, magno in pretio habitos : unde et Hobiners Gallice interdum vocatos mox observamus Hobellarios, quam quidem vocem Hobin ab Hebræo Habras, arcessit Steph. Guichartus. Ut ut sit, ab ejusmodi equis Hobellarii dicti. Will. Thorn. ann. 1364 :

Item dicunt, quod dicti tenentes pro omnibus terris suis in geldabili tenentur, et debent contribuere in omnibus lottis et scottis, in geldabili assessis, videlicet pro warda maris tempore guerræ, pro Hoberariis sagittariis inveniendis, et sustentandis, ubi necesse fuerit super costeram maris.

Mox :

Pro expensis factis circa Constabularios laborantes ad eligendum et ducendum prædictos Hobilarios sagittarios, et in omnibus aliis lottis, etc.

Hic sane Hobellarii videntur fuisse sagittarii, cum nulla interpunctione Hobellarii sagittarii dicantur. Charta Henrici V. in Monastico Anglic. tom. 1. pag. 976 :

Pro munitione et apparatibus hominum ad arma Hobelariorum sagittariorum seu peditum quorumcumque pro obsequio nostro vel hæredum nostrorum in posterum eligendorum, etc.

Tabulæ, describentes Obsidionem Caleti ann. 1350 :

Sub Comite Kildariæ ; Bannerets 1. Knights 1. Esquiers 38. Hobilers 27.

Sub Dom. Reginaldo Cobham. :

Bannerets 1. Knights 6. Hobiners 19. Archers on horse 24. archers on foote 32.

Sub Dom. Fulcone de la Freigud Hibernico :

Bannerets 1. Knights 1. Esquiers 18. Hobilers 14.

Statutum 2. ann. 18. Edw. III. cap. 7 :

Et que gentes d'armes, Hobelers, et Archiers eslus pour aler en le service le Roi d'Angleterre soient as gages le Roy, etc.

Et anno 25. Stat. 5. cap. 8 :

Nul home soit arctes de trover gens d'armes, Hoblers, n'archers, autres que ceux, qui teignent par tiels services, s'il ne soit per commun assent, et grant fait en parlement.

Duravit, inquit Spelmannus, id vocabuli usque ad ætatem Henrici VIII. Vide Will. Dugdalum in Antiquitatibus Warwicensibus pag. 19. col. 1. Opuscula Anglica Roberti Cottoni pag. 264. et Isaacum Casaubonum de Lingua Anglica vetere pag. 192. col. 1.