HOMUNCIONITÆ. Ita vocantur a Prudentio Ebionitæ, Samosateniani, aliique hæretici, qui Christum purum hominem esse, nihilque divinæ essentiæ ac virtutis habere contendebant. Marius Mercator de Anathematismo Nestoriano § 19. 20. pag. 166 :

Photinus autem Nestorii magister verbum quidem hoc Dei esse in substantia negat, sed esse id Dei Filium non vult,... Photinum Romana Ecclesia et participes hujusmodi pravitatis Homuncionitas nominat.

Prudentius in Apotheosi, in carmine Contra Homuncionitas :

Sunt qui Judaico cognatum dogma furori

Instituunt, media Christum ratione secuti

Hoc tantum quod verus homo est, at cælitus illum

Adfirmant non esse Deum, etc.

Hos Ἀνθρωπολάτρας vocat Athanasius libro extremo de Incarnat. Domini, Hominicolas Facundus Hermian. lib. 9. cap. 3. Vide Notas Jo. Baptistæ Cotelerii ad Constitut. Apostol. pag. 271.