HOUSEBOTE, Lignum, quod ex indulgentia Legis conductori de conducto prædio succidere et asportare licet in ædium, sepium, aratrique sui refectionem, etiam ignis subministrandi gratia. Charta Feodi pag. 163 :

Et habebat idem B. Housebote, haybote, cartbote de arbore et boscis dicti manerii competenter, ac etiam firebote rationabile de ramis et scissione arborum, absque projectione vel cimatione earumdem, et absque vasto seu destructione faciendo in eodem manerio, etc.

Charta ann. 1262. apud Kennett. in Antiquit. Ambrosden. pag. 259 :

Concessi etiam prædictæ Aliciæ heybotum et Housbotum in dominicis boscis meis de Acle.

Alia ann. 1363. ibidem pag. 497 :

Dicunt etiam quod de antiqua consuetudine habent Housbote et haybote in bosco domini.

Vide Dugdalum in Antiquitatib. Warwicensib. pag. 665. et Rastallum in hoc verbo ; et supra in Haga, Haybote.