1. INCISIO, Idem quod Tallia. Charta Henrici III. Imp. ann. 1056. pro Monasterio Sancti Maximini Trevirensi apud Nicol. Zyllesium :

Nullus illorum hospitia seu servitia in curtibus Abbatis aut Fratrum, sive a rusticis violenter exigat, nullus eorum per Incisiones aut petitiones homines gravare..... præsumat.

Charta ann. 1468 :

Jus investiendi, devestiendi, clamores, banna, emendas, aspatgia, Incisionem, etc.

Charta anni 1112. e Tabulario Rothonensi :

Alanus Hoelli filius Comes totius Britanniæ... dedit S. Salvatori quamdam consuetudinem...... quæ vulgo Tallia nuncupatur, nos Incisionem nominamus... insuper concessit et in arbitrio et potestate Abbatis sit, ut quotiescumque Comes suos homines Inciderit, hoc est, censum a suis exiget, Abbas suos homines secundum velle suum Incidat, et potestative, ut concessum est, colligat et habeat.

Vide Incisura 1.

2. INCISIO. Paulus Diacon. lib. de Gestis Episcoporum Emerit. in sancto Paulo cap. 1 :

In spe Dei mira subtilitate Incisionem subtilissimam subtili cum ferro fecit, atque ipsum infantulum jam putridum membratim abstraxit.

Encis, dicitur in Stabilimentis S. Ludovici lib. 1. cap. 25. et in Consuetudin. Andegav. art. 44. et Cenoman. art. 51.

3. INCISIO, Sectio, Capitulum in libris. Gennadius de Scriptorib. Eccles. in Severo :

Scripsit... et Collationem Posthumiani et Galli... habitam in dialogi specie, duabus Incisionibus.

Walafridus Strabo in Præfat. ad Theganum :

Huic opusculo ego Strabo quasdam Incisiones et Capitula inserui.

4. INCISIO, ϰόμμα. Ordo Romanus :

Episcopi omni tempore benedicantur ; nunc vero mos est, ut nocturno tempore benedicantur. Secunda namque Incisione, id est, Lectione sexta, egreditur Pontifex de Ecclesia S. Petri, et ascendit Monasterium S. Martini, etc.

Consuetudines Floriacensis Monasterii :

Et 15. Cantica Graduum sub silentio ab unoquoque dicuntur, et post singulas Incisiones ab unoquoque procumbitur ad formas.

Adde Udalricum lib. 5. Consuet. Cluniac. Monast. cap. 5. et Bernardum Monachum part. 2. Ord. Cluniac. cap. 15. Interscissiones, apud Cassianum lib. 2. de Nocturnis orat. cap. 11 :

Et idcirco ne Psalmos quidem ipsos, quos in Congregatione decantant, continuata student pronuntiatione concludere : sed eos pro numero versuum duabus vel tribus Interscissionibus cum orationum interjectione divisos, distinctim particulatimque consummant.

Distinctiones dicuntur in Admonitione Synodali antiqua :

Psalmorum verba et Distinctiones regulariter ex corde cum canticis consuetudinariis pronuntiare sciat.

Pausationes vocat Synodus Narbonensis sub Recaredo Rege :

Per majores vero Psalmos, si fuerint prolixiores, Pausationes fiant, etc.

5. INCISIO, alia notione.

Signum secunda vel tertia Incisione pulsare

, apud Guigonem in Statutis Cartusiensib. cap. 7. § 5. in Statutis antiq. ejusdem Ordin. I. part. cap. 41. § 9. cap. 43. § 5.

6. INCISIO, Typus nummi, Figura. Anastasius in Hist. Eccles :

Cum Arabes non susciperent Romanorum Incisiones in nummis suis.

Theoph. χαραγήν habet.

7. INCISIO, Castratio, apud eumdem Anastasium :

Alios autem... partim suspendio, partim Incisione perdebat.

Ubi Theophanes, ἀπέτεμνεν.

8. INCISIO, vox Architectorum, de qua Jacobus Gothofred. ad leg. 3. Cod. Th. de Excusat. artific. (13, 4.)

9. INCISIO ; Cæsio, Gall. Coupe. Charta Sigfr. episc. Hildesheim. apud Leuckfeld. in Antiq. Gandersheim. pag. 179 :

Prata, pascua et decem legitimæ lignorum Incisiones, etc.

Vide in Incisor.

10. INCISIO, Apertura, per quam aqua effluit, incile, Gall. Coupure. Charta ann. 1125. inter Probat. tom. 2. Hist. Occit. col. 436 :

Primum Guillelmus Incisionem alvei quam fecerat, ita restituat, ut non minus quam antea solebat aqua ad molendinum Bernardi decurrat.

2. INCISURA et Incisio, apud Gromaticos. Vide Arbor.