INCLINATIO, Glossarium mediae et infimae latinitatis, Du Cange et al.

« Inclinatio » (par C. du Cange, 1678), dans du Cange, et al., Glossarium mediae et infimae latinitatis, éd. augm., Niort : L. Favre, 1883‑1887, t. 4, col. 327c. http://ducange.enc.sorbonne.fr/INCLINATIO

INCLINATIO, Salutationis apud Monachos species, quæ soli Abbati debetur. Ingulphus pag. 886. de Priore :

Et quia in medio fratrum rector est eorum, in honore, præter Inclinationes, omnis honor ei et reverentia exhibeatur.

Inclinatio, Submissio, humiliatio. Epist. Archiepiscopi Bulgariæ, in Gestis Innoc. III. PP. pag. 56 :

Multas Inclinationes et magnas preces ad Dominum et gloriosissimum et Cathedralem Apostolicæ sedis, etc.

Ubi perperam editum indivinationes. Rectius in alia ejusdem Archiepiscopi pag. 71 :

Ipse multas Inclinationes et multas sanitates a me Basilio humili Bulgarorum et Blancorum Primate erga patrem universorum... sanctissimum Papam Innocentium, etc.

Inclinatio Ante et Retro. Udalricus lib. 3. Consuetud. Cluniac. cap. 2 :

Quilibet novitius est instruendus, ut regulariter sciat caput inclinare, scilicet non dorso arcuato, ut quibusdam negligentibus est familiare : sed ita ut dorsum sit summissius quam lumbi, et caput submissius quam dorsum : quam Inclinationem nos per usum Ante et Retro appellamus, quia incipit contra Orientem, et finit contra Occidentem.

Hinc formula frequens apud eumdem et Bernardum Mon. in Consuetud. MSS. ejusd. Monasterii, Facere ante et retro, vel facto ante et retro nude. Vide Eadmerum de Similitudinibus

S. Anselmi cap. 9. supra Ante et retro. Glossar. med. Græcit. col. 422. voce Επίϰλισις et Μετανοίαι col. 917.

Inclinatio cum Gyro, Salutatio apud moniales in usu, quæ gyrando fit. Reg. soror. Fontis-Ebr. cap. 48 :

Prosternat se lectrix et Inclinatione facta cum gyro sedeat in ordine suo.