« »
 
[]« Infanc » (par C. du Cange, 1678), dans du Cange, et al., Glossarium mediae et infimae latinitatis, éd. augm., Niort : L. Favre, 1883‑1887, t. 4, col. 350a. http://ducange.enc.sorbonne.fr/INFANC
INFANC, Infang, Manuum injectio, a Saxonico in, præpositio, et fang, Manus, quasi manu apprehensio, unde fangen, Capere. Lex Bajwar. tit. 3. cap. 1. § 3 :
Si in eum contra legem manus injecerit, quod Infanc dicunt, etc.
Ita tit. 4. § 3. et tit. 5. § 3.
Infang-Thefe, Infang-Theof, Infangenetheof, Infanghthiefe, Voces unius ejusdemque originis et notionis, quæ latronis capti in terra alicujus, et saisiti latrocinio, jurisdictionem et cognitionem denotant ; a Saxon. in, quod est Intus, et fangan, Capere, deprehendere, et ðeof, fur. Ita igitur appellatur passim in Chartis Anglicis regale privilegium, alicui a Rege concessum, per quod licet homines, in suo dominio cum re furtiva deprehensos, judicare ac punire : quod quidem privilegium Baronum proprie fuit, ut est in Leg. Edw. Confess. cap. 21. 26. et in Reg. Majest. lib. 1. cap. 4. Quoniam Attachiamenta cap. 100. § 1 :
Barones, qui libertates habent de sok, toll et theame, Infang-thief, outfang-thief, possunt judicare in Curia sua, si aliquis inventus fuerit infra libertatem suam, saisitus de aliquo latrocinio manifesto : sicut handhabband and bak-bearand, et insecutus fuerit per siker-borgh.
Ubi hand-habband, id est, manu tenens, aut in dorso portans rem furtivam. Sic ad hoc, ut quis de latrone cognoscat, necesse est, ut in dominio suo cum re furtiva capiatur, sive sint proprii homines, sive alieni. Ita Cowellus, Rastallus, et alii hanc vocem interpretantur. Will. Thorn. pag. 2030 : Infangenðef,
hoc est, latrones capti in dominio, vel in feodo vestro, et de suo latrocinio convicti in Curia vestra judicentur
. Alii jurisdictionis istius speciem restringunt ad homines solummodo dominii, ut Bracton. lib. 3. tract. 2. cap. 35. § 1. et Fleta lib. 1. cap. 47. § 4. ubi Infangenthef, dicitur
esse latro captus in terra alicujus, saisitus de latrocinio de suis propriis hominibus
. Vocabul. Anglic. Gall. ex Tabulario Beccensi :
Infangenethes, Avoir la progenie de vos nays pris en mainoure, se il se met en vôtre court et seit donné par eus.
Ita etiam Leges Edwardi Confessoris cap. 26 :
De Infangthefe : Justitia cognoscentis (id est, confitentis) latronis sua est (i. Baronis) de homine suo, si captus fuerit super terram suam.
Subdit Bracton. loco laudato :
Sed non sequitur, quod ille (Baro) posset hominem suum proprium, captum extra libertatem suam, reducere usque intra libertatem suam, et ibi eum judicare ex tali libertate ; debet enim quis juri subjacere ubi delinquit. Proprios enim latrones et alienos infra libertatem suam captos judicare possunt.
Ubi alienos latrones judicandi facultatem intelligit, quam Utfangenethef vocabant.
◊ Idem denique supra ait, necesse esse, ut latro sit in saisina furti : alioquin cognitio pertineret ad Curiam Regis. Vides, inquit Spelmannus, legum vicissitudinem, Edwardi enim illa Confessoris ait, justitiam cognoscentis latronis [] ad Curiam Baronis pertinere, qui habet infangthefe : negat suo ævo Bractonus, asserens hoc nemini tunc competere, nisi Regi.
◊ Quoad judicium de Infangthefe capti cum furto manifesto, Britonnus cap. 15. duci eum jubet in Curiam, recitatisque coram Coronatore, festinantius accersito, saccabori et testium accusationibus, nulla expectata responsione, morti judicandum. Grave hoc et Stanfordio visum lib. 1. cap. 23. licet non inficietur. Hodie, subdit idem Spelmannus, nec in Curiis Baronum, qui antiquis suis Chartis Infangthefe, aut outfangthefe obtinuere, nec in Hundredo aut Comitatu talis exercetur jurisdictio. Comitatui ademptam probabile est Statuto Magnæ Chartæ cap. 17. Placita Coronæ Vicecomitibus prohibente : ejusdemque forte vigore Hundredis illis et Wapentachiis, quæ tunc in Vicecomitum erant administratione. Postea Baronibus videtur adempta, vel potius antiquata, Regiis judicibus (ut hodie in Gallia fit) Justitias patrimoniales prævenientibus, sibique ejusmodi criminum cognitionem asserentibus.
© École des chartes.