INFERENDA, Tributum, quod fisco infertur. Gl. Lat. Græc. : Inferendum, εἰσϰομιστέον. Additio 4. Capitul. cap. 84. al. 116 :

Tributum, quod Inferenda vocatur,... hoc est duo solidi pro vacca.

Adde Capitulare ann. 829. cap. 15. Charta Childeberti Regis Franc. pro Monaster. SS. Sergii et Bacchi Andegav. :

Clementiæ regni nostri suggessit, quod de curtibus prædictæ sanctæ Basiliæ, quæ nominantur... annis singulis Inferendam solidos 6. inferendales, et alios 6. de remissaria auri pagensis inferendo in fisci ditiones reddebant.

Et mox :

Ut nullus Judex publicus in ipsas curtes ad agendum... nisi quod Inferendam ipsam idem Abbas per seipsum, aut per missos suos annis singulis in Sacellum publicum reddere deberet.

Denique :

Sed quodcunque pars fisci nostri exinde percipere aut exactare potuerit, nullus vestrum penitus requirere præsumat, nisi tantum annis singulis ipsi solidi duodecim per ipsum Abbatem, aut per missum suum nostris ærariis Inferri debeant.

Gesta Dagoberti cap. 37 :

Centum vaccas Inferendales, quæ ei de Ducatu Cinomanico annis singulis solvebantur, etc.

Quo spectat Charta Childeberti Reg. Fr. ex Tabular. Corbeiensi apud Bollandum :

Eo quod bonæ memoriæ proavus noster Dagobertus quondam Rex per sua auctoritate manu sua roborata, vaccas cento solduris, eo quod in Inferenda de pago Cinomaneco in fisci ditionibus ponebatur, (al. sperabatur) ad ipsam sanctam Basilicam annis singulis concessisset.

Perperam cartas, pro vaccas habet Charta Chilperici Regis apud Mabill. tom. 4. Actor. SS. Ord. S. Benedicti pag. 623. in qua eadem verba recitantur. Ubi infra :

Ut si constat antedictus Princeps Dagobertus quondam Rex ipsas vaccas cento Inferadabas (lege Inferendales) de supradicto pago Cinomonneco, quod annis singolis in fisci ditionibus sperabatur, per sua auctoritate ad ipsa Baselica concessit, etc.

Fredegarius cap. 74 :

Quingentas vaccas Inferendales annis singulis a Chlotario Seniore censiti reddebant.

Adde Aimoinum lib. 4. Hist. Franc. cap. 26. Vitam Aldrici Episc. Cenom. n. 56. Acta Episcopor. Cenom. pag. 186. 222. 226. 244. Instrum. tom. 4. Gall. Christ. Col. 66. Præceptum ann. 570. apud Marten. tom. 1. Amplis. Collect. col. 6. etc.