1. INNORMARE, Ad normam reducere. Amalarius lib. 4. cap. 48. apud Mabillonium tom. 2. Analect. :

Itemque regulæ ejusdem æmulatores Innormans ad nutum Apostolicum, etc.

Chronicon Mauriniacense lib. 3 :

Abbate, qui illis præerat, ab ipsis deposito, transtulerunt domum Macarium ad illius statum juxta Cluniaci consuetudinem viriliter Innormandum.

Tabularium S. Petri Carnotensis :

Post obitum clarissimi Regenfridi Præsulis, qui hunc locum in sancta religione studuit Innormare, etc.

Charta Raimbaldi Archiepisc. Arelatensis in Tabul. ejusdem Eccl. :

Primordium religionis propemodum uno ab hoc fonte Apostoli Trophimi patris nostri cum reperirent totam irrigasse Galliam, in antiquariis, non modica gravabar mentis inquietudine, utpote qui nullum videbam ad præfatum fontem Innormandum accedere, etc.

Occurrit apud Guibertum lib. 1. de Vita sua cap. 8. Bosquetum Hist. Eccl. Gall. part. 2. pag. 58. in Instrum. Gall. Christ. tom. 1. pag. 44. col. 1. in Actis SS. Junii tom. 5. pag. 541. etc.