1. INTERESSE, Usura, fœnus, quod ultra sortem solvitur, vel quod quanti alicujus interest : Gall. Interest. Matthæus Paris pag. 612 :

Propter usuras, pœnas, et Interesse non minima suscipiebant incrementa.

Charta Hugonis Ducis Burgundiæ ann. 1229. apud Perardum pag. 299 :

Volo et concedo, quod carta, quam Odo pater meus fecit de Interessis Episcopi Lingonensis et Ducis Burgundiæ distinguendo apud Castellionem et in pertinentiis stabilita sit et firma.

Statuta MSS. Augerii II. Episc. Conseran. ann. 1280 :

Si usurarius multa cum fœnore lucratus est, de rigore juris talia lucra restituere tenetur, sicut et fur vel raptor, inter quos ipse enumeratur : quia tamen qui nimis emungit, sanguinem elicit, visum est sapientioribus in hoc casu sufficere debitori, si sortem et sumptus et moderatum Interesse duntaxat et non talia lucra recuperet ; quia hoc esset suum repetere cum usuris. Expensæ, sumptus, damna et interesse

frequentius occurrunt, præsertim in judiciis, Gall. Dommages et Interets ; quibus verbis et damnum illatum, et lucrum inde cessans indicantur. Vide Acherium tom. 8. Spicil. pag. 279. Baluz. tom. 2. Hist. Arvern. pag. 319. Martenium tom. 7. Ampliss. Collect. col. 303. D. Secousse tom. 3. Ordinat. Reg. pag. 240. etc.