INTRINSECUS, Intrinsicus, Fœderatus, amicitia et fœdere conjunctus. Pactum ann. 1278. apud Murator. tom. 4. Antiq. Ital. med. ævi col. 409 :

Ad dampnum, destructionem et mortem perpetuam et finalem Veronensium Intrinsicorum et suorum amicorum.

Et col. 410 :

Item quod quandocumque dicti Veronenses Intrinseci equitarent et irent cum exercitu vel cavalcata, etc.

Pluries ibi. Epist. Laudr. Cribel. ann. 1251. ibid. col. 497 :

Hostes nequam Papienses, et Placentini Intrinseci, etc.

Scriptoribus Italis ejus temporis cives intrinseci vel interiores opponuntur expulsis vel bannitis ; sunt igitur Placentini et Veronenses intrinseci ea pars civium quæ tunc imperium in civitate tenebat et alteram ejecerat.