LECTARIUM, Apparatus et instrumentum lecti. Guerardo in Glossar. Irminon. id quod Lectisternium, scilicet Instragulum, thorale, Gall. Courtepointe. Formula Andegav. 1. :

Cido tibi bracile valente solidus tantus, tonencas tantas, Lectario ad lecto vestito valento solidus tantus, etc.

Regula S. Fructuosi cap. 4 :

Quicquid in vestimentis, calceamentis, vel Lectariis Monachorum vetustum fuerit,... pauperibus erogetur.

Cap. 10. de Hospitibus :

Lectaria, Lucerna, et stramina mollia exhibenda.

Testamentum Ermentrudis apud Mabill. de Liturg. Gall. pag. 463 :

Lectaria ad lecto uno qui melior fuerit.

Adalardus in Statutis antiq. Corbeiensib. lib. 1. cap. 3 :

Cottum aut Lectarium, sive sagum in tertio anno accipiant.

Capitulare de Villis cap. 4 :

Ut unaquæque villa intra cameram Lectaria, culcitas, plumatias,... habeat.

Vita S. Benedicti Anian. Abb. cap. 3 :

Ut impigrum depellerent frigus, Lectariis utebantur.

Vita S. Paterni Episc. Abrincens. cap. 9 :

Lectulum nunquam habens, Lectaria nesciens.

Tradit. Fuldens. lib. 2. cap. 38 :

Omnia vero alia quæ remaneant, ita dividentur, ut prædixi, id est, Lectaria, sive villosi, sive manutergia, sive canifelli, sive cujuscumque sint vestimenta, linea vel lanea.