LEDO, Glossarium mediae et infimae latinitatis, Du Cange et al.

LEDO, Ledona. Gloss. Isidori : Ledo, maris æstuatio. Papias : Ledona, æstus maris dicitur. Alibi : Euripus, est deductio maris, vel aquarum, quod fit secundum crementum, vel decrementum Lunæ : et majus, Malina ; minus, Ledona vocatur. Glossarium Saxon. Ælfrici : Ledona, Nep-flod, vel Ebba. Vocis postremæ notionem mox indicat idem Scriptor :

Accessus,

flod. Recessus, Ebbe. Sic fallitur Joannes de Janua, qui Ledoni adscribit quod Malinæ fuit : Ledo, onis, fem. gen. i. maris exundatio, sicut Malina est ejusdem retractio, et dicitur a lædo, dis. Beda de Natura rerum cap. 28 :

Æstus crescentes Malinas, decrescentes autem placuit appellare Ledones.

Glaber Rudolfus lib. 3. Hist. cap. 3 :

Cujus etiam maris (Oceani) excrementum Malinas, decrementum quoque Ledones nuncupant.

Simeon Dunelmensis de Gestis Regum Angl. ann. 793 :

Lindis dicitur flumen quod excurrit in mare, duorum pedum altitudinem habens, quando Ledon fuerit, id est, minor æstus, et videri potest ; quando vero Malina fuerit, id est, major æstus maris, tunc nequit Lindis videri.

Eadem verba habet Roger. Hovedenus 1. part. pag. 405. Willibaldus in Vita S. Bonifacii Archiep. Moguntini tom. 2. Antiq. lect. Canis. :

In loco ubi quondam pretiosus sancti Martyris effusus est sanguis, cum consilio populi Fresonum, structura cujusdam tumuli, propter immensas Ledonis et Malinæ irruptiones, quæ diverso inter se ordine, maris æstu, Oceanique recursu, sed et aquarum diminutione, infusioneque commoventur, ab imo in excelsum usque construeretur, etc.

Vetus scriptor in Appendice ad tom. 3. S. Augustini in lib. 1. de Mirabilib. sacræ Scripturæ cap. 7 :

Hæc namque quotidiana inundatio bis in die a tempore ad tempus per horas 24. semper peragitur, et per alternatas hebdomadas Ledonis et Malinæ vicissitudo comitatur. Sed Ledo sex horas inundationis et totidem recessus habet ; Malina vero grandis per quinque horas ebullit, et per septem horas littorum dorsa retegit, etc.

Vita S. Condedi Monachi Fontanellensis cap. 6 :

Hanc (Insulam Belcinnacam in Sequana) unda marina tempore Malinæ ac Lidonis ter per revolutionem diei ac noctis undique ambiendo invisere non negligit : quæ tanto sui vigoris impetu agitatur, ut ultra hanc Insulam ad orientalem plagam sexaginta millibus et amplius per lympham Sequanæ retrorsum incedens, usque ad locum qui dicitur Pistas, accedat, cum a mari usque ad hanc Insulam lymphaticum iter 30. fere millibus æstimetur. Sicque hoc rheuma, quod de umbilico, sive charybde maris egreditur, bis in die fluctus absorbet, et rursum evomit, etc.

Martyrologium vetus a Furmerio laudatum in Orat. adversus Ubbonem Emmium :

Frisones in loco ubi Martyrum sanguis erat effusus, aggesta terra collem exaltarunt, propter Lidonis et Malinæ quotidianas eruptiones, ex maris æstu quotidiano prævenientes, ubi Ecclesiam extruxerunt.

Est igitur Ledo, seu Ledona, æstus maris languidior, qui per 4. pæne dies, tam ante, quam post secundam atque ultimam Lunæ quadraturam, mense unoquoque accedit, cum certis diebus languidius et minore aquarum cumulo terræ oras adlambit, Malinæ contrarius, quæ fit cum effusius et majori æstuum quantitate in littus proruit et effunditur. Ubi enim Lunam potentiorem credimus in conjunctione et oppositione Solis, debilem in aspectu ejus sextili et trino : ita æstus pariter fieri turgentiores vel depressiores, motum et affectum Lunæ cum Sole exactius prosequentes. Idem Beda :

Æstus Oceani Lunam sequitur, tanquam ejus aspiratione retrorsum trahitur, ejusque impulsu retracto refunditur : quod quotidie bis adfluere et remeare, unius semper horæ et dodrante et semiuncia transmissa, videtur : ejusque omnes cursus in Ledones et Malinas, id est, in minores æstus dividuntur et majores. Sed Ledon a quinta et vicesima Luna inchoans, quot horis occurrit, tot et recurrit. Malina autem a 13. et 28. incipiens, citior in accessu, sed tardior in recessu, 7. diebus et 15. boris perseverat. In medio sui semper Lunam primam et decimam quintam ostendens, et per æquinoctia vel solstitia solito validius exæstuans : per octonos autem annos, ad principia motus et paria incrementa, certissimo Lunæ revocantur ambitu : illa semper Aquilonia tenente mitiores, quam cum in Austro, digressa propiore nisu vim suam exercet, æstus adfluere naturalis ratio cogit.

De his agit pluribus idem Scriptor cap. 27. Cui adjungenda quæ Procopius lib. 1. de Bello Gothico cap. 1. extremo, Mela lib. 3. cap. 1. Vegetius lib. 5. cap. 12. Plin. Will. Brito lib. 8. Philipp. pag. 184. et alii tradunt de causis reciproci æstus ad Lunæ affectus crescentis aut decrescentis.

◊ Ledonum meminit etiam Ermentarius

lib. 5. de Vita et translat. S. Philiberti cap. 1 :

Quia ipsa Insula Ledonibus maxime impedientibus non semper accessibilis esse potest nostratibus : cum Normannis cunctis temporibus quibus mare tranquillatur, inaccessibilis esse minime dignoscatur.

Ingulphus pag. 902 :

Mane exorta maxima tempestas, similiter et Ledone in naviculam irruente, etc.

Et Willelmus Malmesbur. lib. 2. de Gestis Reg. cap. 10 :

Eodem anno (979.) fluctus marinus, quem Græci Euripum, nos Ledonem vocamus, mirum in modum excrevit, quantum nulla hominum memoria potest attingere, ita ut villas ultra milliaria submergeret, et habitatores interemptos necaret.

Sed hisce locis Ledo pro Malina perperam usurpatur. Vita S. Theodulphi Abbat. n. 2 :

Sed et in vita eorum et in morte stupenda fiunt miracula : quorum alia Malinas æquiparant immensitate, Ledones alia numerositate.

Vita S. Hermelandi :

Omnes cursus maris in Ledones et Malinas, id est minores et majores æstus dividi.

◊ De vocis Ledo, vel Leduna etymo variæ sunt Scriptorum sententiæ. Bridefertus Ramesiensis vetus Bedæ Interpres Malinam a majore Luna, Ledonam quasi læsam undam, dictam putavit. Alii Ledunas, quasi lætas Lunas, dici volunt, quia cum mare subsidet, temperatius est, et placidius. Unde Vegetius lib. 5. cap. 11. de Luna :

Lætus orbis ac lucidus serenitatem navigiis repromittit.

Contra vero Malinam, quasi malam vel malignam Lunam, quia cum mare intumescit, ventis magis obnoxium sit. Josephus Scaliger lib. 2. de Emendat. temp. pag. 170. et Spelmannus Ledunam a Saxonico Leid, quod est Lenis, deducunt, quod Leduna tempore mare lenius appareat : idque eliciunt ex Beda lib. de Rat. temp. cap. 15. qui ait veteribus Anglis Lidam, vocari menses Junium et Julium, quod sint blandi et navigabiles, et

in utroque mense et blanda sit serenitas aurarum, et navigari soleant æquora

. Olaus Wormius in Fastis Danicis lib. 1. cap. 11.

Ledunam et Malinam

voces esse adstruit Danicas seu Runicas, Malinam nempe a Magle, id est, magnus, dictam, quasi maglinam : quia Oceani intumescentis æstus majori copia aquas in littus effundit : Ledunam vero a Liden, id est, parvus, eo quod decrescente æstu parvum ac minus reddatur mare, quam antea erat : proindeque Bedam hæc nomina secum ex Cumbria in Angliam detulisse. Neque ab hac sententia procul abest Josephus Scaliger loco citato, scribens, Danos et Saxones πλημμύρας majores, Malinas ; minores autem, Ledunas, vel Lidunas vocasse : tametsi hæc nomina tribuisse Malinis ac Ledunis quæ fiebant in pleniluniis amborum æquinoxiorum scribat. At longe ante Bedam isthæc nota esse vocabula constat, cum Marcellus Empiricus, qui in Gallia Theodosio seniore imperante vixit, utriusque ita meminerit, ut non tam æstui maris, quam Lunæ ipsi tribuisse videatur :

Lidunam

enim Lunam veterem, seu decrescentem, vocat. Sic quippe cap. 16 :

Herba quæ Gallice Calliomarcus, Latine equi ungula vocatur, collecta Luna vetere Liduna die Jovis, etc.

Et cap. 25 :

Colligitur die Jovis Luna vetere Liduna ante prandium, etc.

Eodem cap. :

Conficitur vetere Luna et Liduna a mense Martio, etc.

Lidunæ autem alio loco Malinam opponit :

Conficitur 12. Kal. Julias ; non interest quo die, vel Luna, vel Malina, dummodo supradictus dies observetur.

Ubi indubie pro Luna, legendum Liduna. Unde nescio an non conjiciendum sit potius voces esse veterum Gallorum, quas ii Lunæ decrescenti ac plenæ tribuerint : ita ut postea ad ipsos maris æstus decrescentes et crescentes secundum Lunæ ipsius affectus transtulerint.

◊ Prædictis addo quæ habet Cleiracus de vocabulis rei navalis :

Au renouveau et au plain de la Lune, les eaux de la mer marinent et inondent au plus haut, et lors c'est Chef d'eau,

Malina, id est, major æstus :

A suite et trois jours aprés le renouveau, ou le plain à chasque retour de marée, les eaux décroissent, et n'avancent si avant, et ce depuis le troisiéme jour de la Lune nouvelle, jusques au premier quartier, et depuis le troisiéme jour du plain jusques au dernier quartier, et pendant cette langueur ou décroissement, sont eaux mortes,

Ledon, minor æstus :

De sorte qu'à ce premier quartier, et jusqu'au dixiéme jour de la Lune, c'est Basses eaux. L'onziéme jour qui est aprés le premier quartier, les marées commencent à surmonter la marée suivante plus que la précedente, et lors sont eaux vives. Ce qui procede jusques au plain et trois jours aprés que derechef, c'est Chef d'eau continuant de la mesme revolution d'eaux mortes, jusqu'au dernier quartier, et de là viennent eaux vives jusques au renouveau.

Cæterum exstat in Bibl. Regia Cod. 1121. Tractatus de Malina et Leduna.