LEVITIANA. Vita 2. S. Carthaci Episc. num. 2. S. Mochuda ad prædictum

S. Colmanum venit in suo Monasterio Lainneala manentem ut veniens secum Levitianam signaret in suo Monasterio Raithin : quia mos S. Colmano erat, cum angelis loca Levitianarum signare, et donatum est a Domino S. Colmano, ut filii mortis non assurgerent in Levitianis, quas ipse signaret.

Infra :

Exivi ad Levitianam cum angelis signare, revertere, et sicut videbis signa minima constituta per senem in Australi plaga cellæ tuæ, ita constituit Levitianam : et ne tibi videatur modica, qui ab alia tibi major ab angelis in tua alia civitate in australi Hiberniæ regione signabitur. Et reversus S. Carthagus ita invenit Levitianam signatam, sicut S. Colmanus dixit.

Hic benedictionem cœmeterii auguratur editor ; cui utcumque favet Vita S. Declani Episc. tom. 5. Julii pag. 608 :

Cujus sacrum corpusculum... debito honore in sua civitate Ardmor in Levitiana, quam ipse jussione angelica signavit, sepultum est.

Sollerius interpretatur sacellum, in quo sepeliri voluerit vir sanctus, aut habitum seu vestem in qua sepultus sit : malim cœmeterium. Vita S. Coemgeni, tom. 1. Junii pag. 317 :

Levitianaque monachorum tuorum tam sancta erit, ut nullus eorum introiens sub humo, tormenta inferni pertulerit.