LIBRARIUS, Librorum descriptor. Isidor. lib. 6. cap. 14 :

Librarii iidem qui Antiquarii vocantur. Sed Librarii sunt qui et nova et vetera scribunt, Antiquarii qui tantummodo vetera, unde et nomen sumpserunt.

Petrus Damianus lib. 7. Epist. 19 :

Cum alio Monacho,... litteris æque perito, atque Librario.

Supra :

Et quoniam scribendi peritus extitit, non pauca nobis librorum volumina pollucibiliter exaravit.

Ordericus Vitalis lib. 9. pag. 718 :

Nulla unquam, ut reor, Sophistis, in bellicis rebus gloriosior materia prodiit, quam nostris nunc Dominis Poëtis atque Librariis tradidit.

Vita S. Guthlaci Anachoretæ cap. 32 :

Habuit siquidem in comitatu suo virum Librarium Wilfridum, etc.

Acta S. Samsonis MSS. :

Quodam die festo dum ad Ecclesiam convenirent, et ibi sermocinationem inter multos de Librario quodam in longinquam Aquilonis terram habitante, et quamdam præcantationis artem hominibus exercente audirent, ad quem de multis provinciis innumera multitudo frequentare consueverat, quia omnia quæ illis dicebat, pro certo et sine dubio eveniebant.

Haud satis certa Librarii notio hocce in loco. Posset intelligi vir litteratus, qui librorum lectione hanc creditam acquisierat rerum futurarum præscientiam. De Librariis sive Scribis, variisque eorum generibus disserit Brencmannus lib. 2. Hist. Pandect. cap. 5. Murator. Antiq. Ital. tom. 3. col. 849. Savin. Histor. Jur. Roman. med. temp. tom. 3. cap. 25. § 218.