LIMOGIA, Opus de Limogia, seu Lemovicinum, in Charta ann. 1197. apud Ughellum tom. 7. Ital. Sacr. pag. 1274 :

Duas tabulas æneas superauratas de labore Limogiæ.

Alia ann. 1231. apud Catellum in Historia Occitan. pag. 901 :

Duo bacini qui sunt de opere Lemovitico.

Synodus Wigorniensis ann. 1240. cap. 1 :

Duæ pyxides, una argentea vel eburnea, vel de opere Lemovicino, in qua hostiæ conserventur.

Monasticum Anglic. tom. 3. pag. 310 :

Duo candelabra cuprea de opere Lemovicensi.

Pag. 313 :

Duæ coffræ rubeæ de opere Lemovicensi, etc.

Pag. 331 :

Una crux de opere Limoceno.

Vetus Scheda ex Camera Computor. Parisiens. :

Item l'an 1317. en 11. jour de Juillet envoya Monsieur Hugues d'Angeron au Roi par Guiart de Pontoise un chanfrain doré à testes de liepars de l'euvre de Limoges à deux crétes, du commandement le Roi, pour envoier au Roi d'Armenie.

Ita vocant encausticen, vulgo Email, qua imprimis præcellunt Lemovices, quorum urbs Limodia dicitur in veteribus Annalibus Francor. et in Hist. Rotonensis monast. lib. 1. cap. 9. de qua quædam attigit Andreas Felibienus lib. 1. de Elementis Architecturæ, etc. cap. 10. Vide Smaltum, et Ventilabrum.