LOCALE, Localis, Logalis, Ubi domus ædificari potest, nostris Masure, a voce Latina Locus, ni fallor. Charta ann. 1058. ex Archivo S. Victoris Massil. :

Donamus Locales aptos ad faciendum molendinum.

Tabularium Conchense in Ruthenis Ch. 24. sub Philippo Rege :

Et Locale ad habitandum inter Ecclesiam et stratam, sicut..... in præsentia illius terminavimus.

Charta ann. 1167 :

Ego Guillelmus Dominus Montispessulani..... concedo Deo et S. Mariæ et Ordini Cistertiensi... illud Locale terræ cum introitibus, exitibus et suis pertinentiis, in quo est ædificatum oratorium, etc.

Alia Will. D. Montispess. ann. 1103 :

Qui habent Logalem pro domo facienda.

Alia ann. 1309. in 2. Regesto Philippi Pulcri Regis Franc. n. 75. ex Tabulario Regio :

Item quoddam Locale infra castrum ejusdem loci.

Alia ann. 1231. in Regesto Comitat. Tolosæ fol. 39 :

Item restituit dominus Comes Localia circa turrim, etc.

Alia fol. 46 :

Domus et Localia domorum, ædificia et bastimenta, etc.

Consuetudines Montispessuli :

Quilibet habitator Montispessuli pro domo vel Locali suo,... debet solvere lesdas et cupas, et Bajulus Montispessul. debet ei laudare illam domum, vel illud Locale, salvo suo consilio, si dominus habebit ibi laudimium.

Charta Geraldi de Sentis ex Archivo D. Marchionis de Flamarens :

Tradiderunt... totam illam domum et Localem in quo est.

Charta ann. 1300. tom. 2. Hist. Dalphin. pag. 100 :

Localia ubi morabantur milites... non removeantur.

Vide tom. 11. Spicilegii Acheriani pag. 339. et Ughellum tom. 4. pag. 1211.