LUXURIA, Stupri peccatum. Luxus venereus, apud Aurelium Victor. in Epitom. in Constantino ; Luxuriæ concubinaticæ, in Concilio Meldensi cap. 74. Concilium Aquisgranense III. ann. 860 :

Canones cum de incestis præscribunt, de conjugatis loquuntur, non de his qui non licite passim coëunt, quos vel Luxuriosos, vel adulteros vocari manifestum est.

Mox :

Cæterum vel qui nondum nupti sunt, vel qui intercedente morte separati sunt, si concumbant cum alieno, non tales adulterio, sed Luxuriæ crimine denotantur.

Concilium Arelatense ann. 1267. c. 12 :

Item illi, qui Luxuriam expleverunt, cum matre, sorore, vel cum alia consanguinea sua, etc.

Vetus Interpres Novellæ 77 :

Ut non Luxurientur homines contra naturam.

Vide Reginonem lib. 2. cap. 35. Occurrit passim.