MACRONA, Porticus, ut videtur, aut solarium in longum porrectum, testudinatum et cameratum : quasi μαϰρὸν dictum. Anastasius Bibliot. in Leone III. pag. 142 :

Macronam vero ipsius Lateranensis Patriarchii, quæ extenditur a campo et ultra imagines Apostolorum..... restauravit.

Idem :

Camera ipsius Macronæ. Μάϰρωνα

etiam in Patriarchio CPolitano exstitisse auctor est Nicetas in Alexio Manuel. F. cap. 6. et urbe a Francis primum capta conflagrasse, in Isaacio et Alexio cap. 2. Priore loco ἀνδρῶνα, seu locum viris destinatum, fuisse macronem docet, ex quo Wolfius, ædem esse, ubi Catechumeni instituebantur, perperam putavit, cum idem sit Macron, ac Andron, de qua voce suo loco egimus. De macrona Lateranensi quædam attigit Nicol. Alemannus in Dissertat. de Lateranensibus parietinis pag. 30. 31. De CPolitana Cangius in CPoli Christ. lib. 2. sect. 8. n. 3.