10. MANDATUM, Domus hospitum in Monasteriis, quod hospitum advenientium pedes lavarentur. Chronicon Lobiense :

Fabricam domus susceptionis hospitum, quam Mandatum vocant, perfecit.

Historia Abbatiæ Condomensis pag. 507 :

Fecit reparari et meliorari domum Mandati, ubi recipiantur hospites et pauperes.

Silvester Giraldus in Cambriæ Descript. cap. 10. de Wallensibus :

Adeo nempe hospitalis hic gratia communione lætatur, quod itinerantibus ea nec offeratur, nec petatur : tantum etenim domum intrantes protinus arma custodiæ tradunt, deinde statim aquam offerentibus, si pedes ablui permiserint, hospitio suscepti sunt : aquæ nimirum pedibus oblatio, hospitalis apud hanc gentem est invitatio.

Vide librum Usuum Ordinis Cisterciensis cap. 79. 107.