MARTYRARIUS, Idem qui Mansionarius, Custos Ecclesiæ, qui sacras in Ecclesia reliquias custodit, servat. Formula 48. ex Andegavensibus :

Ideo convenit nobis unanimiter consentientes, et per voluntatem Martyrario nomen illo Presbytero, ut ipso infantulo ad homine, nomen illo, venumdare deberemus, etc.

Gregorius Turon. lib. 2. de Mirac. cap. 46 :

Post obitum Proserii Martyrarii.

Lib. 4. Hist. cap. 11 :

Unde factum est, ut conjuncti Clerici Leubaste Martyrario et Abbate,.... Arvernum properarent.

Testamentum S. Aredii :

Turres, calices, pallas et coopertoria prædictis Martyrariis ad custodiendum tradidimus.

Concilium Aurelianense II. can. 13 :

Abbates, Martyrarii, Reclusi, vel Presbyteri, apostolia dare non præsumant.

Idem qui Custos Martyrum, Anastasio in S. Silvestro PP.

Hic constituit, ut si quis desideraret in Ecclesia militare, aut proficere, ut esset prius Ostiarius, deinde Lector, et postea Exorcista per tempora, quæ Episcopus constituerit, deinde Acolythus annis 5. Subdiaconus annis 5. Custos Martyrum annis 5. Diaconus annis 5. Presbyter annis 3.... et sic ad ordinem Episcopatus ascendere

. Vita S. Zozimi Episcopi Syracusani n. 6 :

S. Zozimus cum ætate, tum virtutibus inter Sanctos proficiens, custos pretiosi loculi S. Virginis Luciæ constituitur a sancto Fausto Abbate ipsius Monasterii.

Et num. 9. idem S. Zozimus

ad Ecclesiæ loculique S. Virginis Luciæ custodiam relictus

, moxque Ostiarius et templi custos, dicitur. Vide Synodum Rom. sub eod. Silvestro cap. 11. et quæ annotavimus in voce Capellanus.