MASCARATI et Mascherati, ab Italico Maschera, Gall. Masque, appellati apud Januenses qui Gibellinorum factioni notissimæ adhærebant. Charta ann. 1231. Hist. Massil. pag. 257 :

Vos jurabitis ad sancta Dei Evangelia quod nunquam inimicos prædictæ civitatis Mascaratos et suos recipietis.

Statuta Massil. lib. 3. cap. 36 :

Statuimus..... quod quicumque civis Massiliæ, vel emet de cætero aliquas possessiones seu aliquas res immobiles quæ sint, vel fuerint sub dominio Mascaratorum, etc.

Chron. Januense Jacobi de Voragine apud Murator. tom. 9. col. 55 :

Anno Domini mccxcv. de mense Januarii facta est pax generalis et universalis in civitate Januæ inter illos qui dicebantur Mascarati sive Gibellini, et illos qui dicebantur Rampini sive Guelfi.

Bartholomæi Scribæ Annal. Genuens. lib. 6. ad ann. 1244. apud eumdem tom. 6. col. 505 :

Qui dominus Philippus, quum jam Potestas fuisset alias, et voluntates civium Januæ cognosceret, tanquam sagax et probus in principio sui regiminis pacem inter Rampinos et Mascheratos componere curavit.

Adde coll. 491. 492. 493. 513. 517. et Histor. Cortusior. lib. 2. apud eumdem Murator. tom. 12. col. 800.