6. MASSA Candida, Locus ita dictus apud Carthaginem, in quo sub Imperatoribus gentilibus et in Christianos sævientibus, fovea erat calce plena, in quam Christiani, gentilium diis sacrificare renuentes, præcipitabantur. Prudentius Poristeph. Hymn. 4 :

Prosiluere alacres cursu rapido simul trecenti,

Gurgite pulvereo mersos liquor aridus voravit,

Præcipitemque globum, fundo tenus implicavit imo.

Corpora candor habet, candor vehit ad superna mentes,

Candida Massa dehinc dici meruit per omne seclum.

Ubi Glossæ Isonis Magistri : Candida massa, id est, ccc. Martyres. Massa Cypriani dicuntur. Vincentius Belvac. lib. 12. cap. 130. de Passione 18. Martyrum, qui dicuntur Massa Candida :

Hi præ innumera multitudine Massa sancta, vel Candida appellantur.

Vide Savaron. ad Sidon. lib. 6. Epist. 1. et Leonardum Fuchsium ad Myrepsum sect. 3. cap. 89.